Atgongumerkjatreytir

Serligar treytir viðvíkjandi Covid-19 í sambandi við altjóða dystir á Tórsvølli
UEFA hevur undir nærri ásettum treytum loyvt, at áskoðarar aftur kunnu vera til altjóða dystir. Fyri at lúka hesar treytir hevur Fótbóltssamband Føroya ásett treytir viðvíkjandi Covid-19 á Tórsvølli.

Endamálið við hesum treytum er at minka mest møguligt um smittuvandan. Tað er sera umráðandi fyri okkum, at trygdin hjá gestum okkara er í hásæti.

Vit fylgja tilmælum og leiðreglunum frá landsmyndugleikunum og hava sett fleiri tiltøk í verk, so áskoðarar kunnu kenna seg tryggar. Tað er tó samstundis av alstórum týdningi, at allir áskoðarar halda fylgjandi treytir:

– Áskoðarar, ið eru sjúkir av Covid-19, hava Covid-19 sjúkueyðkenni ella eru í sóttarhaldi, sleppa ikki til dyst á Tórsvølli.

– Allir áskoðarar skulu brúka masku. Hetta er eisini galdandi, tá áskoðarar eru í bíðirøð fyri at sleppa inn á Tórsvøll.

– Allir áskoðarar hava skyldu til at halda frástøðu á í minsta lagi 1 metur. Hetta er serliga týdningarmikið at minnast til, tá ein stendur í bíðirøð til eitt nú at sleppa inn á Tórsvølli ella við vesi og sølubúðir.

– Allir áskoðarar hava skyldu til einans at brúka sítt ávísta pláss. Áskoðarar skulu bæði áðrenn og undir dystinum halda seg til ávísta plássið, tó undantikið um ein skal nýta vesi ella sølubúð.

– Allir áskoðarar hava skyldu til at hava gott reinføri, herundir at nýta hondspritt, bæði við inngongdina og vesi.

– Allir áskoðarar hava skyldu til at avmarka kropsligt samband við onnur sum til dømis lógvatak og klemm (hetta er eisini galdandi í samband við møguligan fagnað í samband við eitt nú mál).

Tað er samstundis týdningarmikið, at allir áskoðarar kanna, hvør inngongd skal nýtast og halda seg til tær avmarkingar, sum eru á og kring Tórsvøll í samband við dystin.

Staðfesting av Covid-19 eftir vitjan á Tórsvølli
Um ein áskoðari fær staðfest Covid-19 eftir vitjan á Tórsvølli hevur viðkomandi skyldu til at boða Landslæknanum frá hesum, og fær Landslæknin í sambandi við smittusporan eftir umbøn útflýggjað nærri upplýsingar frá Fótbóltssambandi Føroya um, hvørjir persónar, ið hava verið á Tórsvølli í samband við dystin.

Meir kann lesast HER (PDF)

TREYTIR/SKILHALDSREGLUR Í SAMBANDI VIÐ LANDSDYSTIR SKIPAÐIR AV FSF

Tað er ábyrgd hjá atgongumerkjakeypara og atgongumerkjaseljara at kunna seg um og góðkenna hesar keypstreytir, skilhaldsreglur v.m.

Brot á hesar treytir og reglur kann hava afturvísing, burturvísing og/ella endurgjaldskrav við sær. 

Atgongumerki
Atgongumerkjaprísir til ymsu dystirnar eru lýstar á heimasíðuni hjá Fótbóltssambandi Føroya: www.fsf.fo.

Atgongumerki mugu ikki verða brúkt sum vinningur í kapping ella í øðrum handilsligum sambandi uttan skrivliga avtalu við FSF.

Atgongumerki, ið verða seld øðrum oman fyri ásetta virði, verður mett at vera svartabørshandil. Svartabørshandil verður meldaður til løgregluna.

Áskoðaraøkir
Áskoðaraøkini til landsdystir eru býtt sundir í økir til viðhaldsfólk hjá heimaliðnum (vanliga 90% av stadionplássunum) og økir til viðhaldsfólk hjá vitjandi landsliðinum (vanliga 10% av stadionplássunum).

Tað er ábyrgdin hjá atgongumerkjakeypara og atgongumerkjaeigara at fáa sær atgongumerki til tað ella tey økir, sum eru sett av til viðhaldsfólk hjá tí landsliði, ið keypari og eigari heldur við. 

Atgongd til stadion og kanning av áskoðarum
Inn á stadion slepst bara við at vísa gyldugt atgongumerki. Allir áskoðarar verða kannaðir við inngongdina.

FSF kann bert veita vissu fyri, at fólk sleppa inn til dystarbyrjan, um fólk standa í biðiraði í seinasta lagi 30 minuttir, áðrenn dysturin byrjar.

Burturmist atgongumerki verður ikki endurgoldið.

Atgongd og steðgur
Atgongumerkið gevur atgongd til ta inngongd og tað tænastu- og áskoðaraøkið, sum stendur á atgongumerkinum. Verður roynt at sleppa inn ella at seta seg aðrastaðni, kann hetta hava við sær burturvísing frá stadion. 

Alkohol
Alkohol og onnur rúsandi evni mugu hvørki verða tikin inn á stadionøkið ella nýtt har.

Áskoðarar, ið hava kenning ella eru ávirkaðir, kunnu av trygdarávum verða burturvístir .

Skilhaldsreglur
Áskoðarar skulu halda seg til skilhaldsreglurnar hjá FSF og hjá stadionøkinum, umframt til aðrar ásetingar hjá myndugleika og løgreglu á staðnum.

Lutir, sum eru bannaðir á stadionøkinum
– termokannur
– fløskur og dósir
– hvassir lutir
– kompressarahorn
– laserljós
– stór videomyndatól og fotomyndatól
– vápn ella lutir, ið minna um vápn ella kunnu verða nýttir sum vápn 
– fýrverk, hondbluss og annað eldverk .

Eftirlitsfólkini meta í hvørjum einstøkum føri um at banna aðrar lutir, ið kunnu metast at vera vandamiklir.

Vøllurin
Ein og hvør atgongd til vøllin er bannað. Brot á skilhaldsreglurnar hjá FSF og hjá stadionøkinum kann hava við sær burturvísing og/ella endurgjaldskrav.

Afturvísing og burturvísing
Brot á keypstreytir kunnu hava við sær afturvísing ella burturvísing frá stadion.

Ábyrgdarfólk hjá FSF, eftirlitsfólk og løgregla hava heimild til at afturvísa ella burturvísa áskoðarar, sum ikki halda ásettu treytir.

Afturvísing ella burturvísing ger ikki, at atgongumerkið verður endurgoldið. Heldur ikki verður annar kostnaður, sum beinleiðis ella óbeinleiðis verður settur í samband við tiltakið ella tilburðin, endurgoldin.

Endurgjaldsábyrgd
Brot á treytir og regluverk kann hava við sær afturvísing, burturvísing og/ella endurgjaldsábyrgd.

FSF kann eisini seta í verk endurgjaldskrav mótvegis tí ella teimum, sum elva til sektarrevsing og/ella fyri møguligan inntøkumiss í sambandi við, at Fótbóltssamband Føroya av UEFA ella FIFA fær álagt forboð ímóti at spæla ein ella fleiri landsdystir á Tórsvølli ella á øðrum stadion.

Ábyrgd:
Landsdystir verða leiktir sum fyriskipað vísandi til Fótbóltslógina (Laws of the Game).

FSF hevur onga ábyrgd ei heldur nakra endurgjaldsábyrgd fyri, at dystur verður steðgaður ella avlýstur vísandi til Fótbóltslógina og kappingarreglur, sum kappingarfyriskiparin hevur lýst. Áheitanir um hetta verða vístar til fyriskiparan: Fótbóltssamband Føroya, Gundadalur, 100 Tórshavn ella teldupostur: [email protected].