Fótbóltslógin 2024 (§1 – §17) sum PDF
1. Vallarundirlag
Vøllurin skal allur, sum hann er, vera av grasi ella, um kappingarreglurnar loyva tí, av graslíki. Um kappingarreglurnar loyva tí, kann ein blanding millum veruligt gras og graslíki loyvast (hybrid skipan).
Liturin á graslíki skal vera grønur.
Um graslíkisvallir verða nýttir í kappingardystum millum lið, sum eru limir í sama fótbóltssambandi, ella í altjóða dystum millum feløg, skulu vallirnir lúka treytirnar, sum FIFA hevur ásett í THE FIFA QUALITY, QUALITY PROGRAMME FOR FOOTBALL TURF ella THE INTERNATIONAL MATCH STANDARD. Hesar treytir skulu verða loknar, um IFAB ikki hevur givið serligt undantaksloyvi.
2. Vallarmerkingar
Vøllurin skal vera fýrkantaður og merktur við linjum, sum ikki eru vandamiklar; sama evni, sum verður til til graslíkisvallir, kann nýtast til linjurnar á náttúrligum vallum, um hetta ikki er vandamikið. Hesar linjur hoyra til tey øki, sum tær avmerkja.
Bert tær linjur, sum eru nevndar í §1 skula merkjast á vøllin. Har graslíki verður nýtt, er loyvt at hava aðrar linjur á vøllinum, treytað av, at hesar hava annan lit, og at tað er greiður munur á teimum, og linjunum, sum verða nýttar til fótbólt.
Tær báðar longru linjurnar verða nevndar síðulinjur. Tær báðar styttru linjurnar verða nevndar mállinjur.
Vøllurin er býttur í tvær hálvur við eini miðlinju, sum kemur saman í miðjuni á síðulinjunum.
Miðbletturin er merktur mitt á miðlinjuni. Ein sirkul við einum radius, sum er 9,15 metrar, er merktur rundan um miðblettin.
Loyvt er at gera frámerki 9,15 metrar frá hornaboganum fyri at tryggja, at mótleikarar halda ta kravdu fjarstøðuna, tá ið hornaspark verður tikið. Hesi frámerki skulu vera uttan fyri vøllin, og tey skulu vera vinkulrøtt við mállinjuna og/ella síðulinjuna.
Allar linjur skulu hava somu breidd, sum er í mesta lagi 12 cm. Mállinjurnar skulu hava somu vídd sum málstengurnar og yvirliggjarin.
Um ein leikari merkir nakað á vøllin, ið ikki er loyvt, skal hann verða ávaraður fyri at sýna óhøviskan atburð. Um dómarin sær hetta verða gjørt, meðan leikur fer fram, skal hann ávara leikaran, ið fremur brotið, fyri óhøviskan atburð, næstu ferð steðgur er í leiki.
3. Mát
Síðulinjan skal verða longri enn mállinjan.
Longd: í minsta lagi 90 metrar (100 yards), og í mesta lagi 120 metrar (130 yards).
Breidd: í minsta lagi 45 metrar (50 yards), og í mesta lagi 90 metrar (100 yards).
4. Altjóða mát
Longd: í minsta lagi 100 metrar (110 yards), og í mesta lagi 110 metrar (120 yards)
Breidd: í minsta lagi 64 metrar (70 yards), og í mesta lagi 75 metrar (80 yards)
Kappingarreglur kunnu avgera longd á mál- og síðulinju út frá omanfyri standandi mátum.
Á síðu 37 í PDF-fílinum sæst mynd av vøllinum.
5. Málteigurin (5-meturin)
Tvær linjur verða merktar rættvinklaðar við mállinjuna, 5,5 metrar frá innaru síðu á hvørjari málstong. Hesar linjur ganga 5,5 metrar inn á vøllin, og tær verða bundnar saman við eini linju, ið er javnfjar við mállinjuna. Tað økið, sum hesar linjur merkja av, er málteigurin
(5-meturin)
6. Brotssparksteigurin (16-meturin)
Tvær linjur verða merktar rættvinklaðar við mállinjuna, 16,5 metrar frá innaru síðu á hvørjari málstong. Hesar linjur ganga 16,5 metrar inn á vøllin, og tær verða bundnar saman við eini linju, ið er javnfjar við mállinjuna. Tað økið, sum hesar linjur merkja av, er brotssparksteigurin.
Inni í hvørjum brotssparksteigi verður ein brotssparksblettur merktur
11 metrar frá miðjuni millum málstengurnar.
Ein bogi, ið hevur ein radius, sum er 9,15 metrar frá hvørjum brotssparksbletti, verður merktur uttan fyri brotssparksteigin.
7. Hornaøkið
Hornaøkið verður merkt við einum kvartum sirkli, sum hevur ein radius á 1m frá hornaflagginum. Sirkulin verður gjørdur inni á vøllinum.
Á síðu 38 í PDF-fílinum sæst mynd.
8. Flaggstengur
Ein stong, sum ikki má vera lægri enn 1,5 metrar, og sum ikki má hava spískan topp, skal verða sett í hvørt horn á vøllinum. Flagg skal vera á flaggstongini.
Stengur kunnu eisini verða settar við miðlinjuna. Tær skulu vera í minsta lagi 1 metur uttan fyri síðulinjuna.
9. Tekniska økið
Tekniska økið verður nýtt í dystum, sum verða leiktir á vallum, har eitt øki við setrum er til leiðarar, eykaleikarar og útskiftar leikarar, og eru hesar notur vegleiðandi:
Tey, sum eru í tekniska økinum:
10. Mál
Mál skulu vera mitt á báðum mállinjum.
Málini eru gjørd úr tveimum loddrøttum stongum, sum eru líka langt burtur frá hornafløggunum, og tær verða bundnar saman í erva við einari tvørstong, ið liggur vatnrætt. Málstengurnar og tvørstongin skulu vera framleidd úr góðkendum evni og skulu ikki vera vandamikil. Stengur og tvørstong skulu hava sama skap, og skal hetta vera fýrkantað, rætthyrnt, runt, elliptisk ella ein samanrenning av teimum fýra formunum.
Viðmælt verður, at øll mál, sum verða nýtt í kappingum, sum verða spældar undir FIFA ella sersambondunum, lúka treytirnar í FIFA Quality Programme for Football Goals.
Fjarstøðan millum málstengurnar er 7,32 metrar, og fjarstøðan frá undirsíðuni á tvørtrænum niður á vøllin er 2,44 metrar.
Í mun til mállinjuna skulu stengurnar standa soleiðis, at tað samsvarar við myndina (sí s. 37 í ensku bókini).
Málstengurnar og tvørstong skulu vera hvít og skulu hava somu vídd og dýpd, sum ikki skal vera meira enn 12 cm.
Um tvørstongin fer úr stað ella brotnar, verður leikur steðgaður, til hon er gjørd aftur ella fingin í rætta støðu aftur. Leikur verður tikin upp aftur við uppkasti. Ber ikki til at gera tvørstongina aftur, skal dysturin slítast. Tað er ikki loyvt at nýta reip ella nakað annað vandamikið ístaðin fyri tvørstongina.
Net kunnu verða fest í málini og í undirlagið aftan fyri málini treytað av, at tey eru væl fest og ikki órógva málmannin.
Trygd
Mál (íroknað mál, sum kunnu flytast) skulu verða trygt fest í undirlagið.
Á síðu 37 í PDF-fílinum sæst mynd..
11. Máltøkni (MT)
MT kann nýtast við tí endamáli at vátta, um eitt mál er skorað ella ikki fyri at stuðla avgerð dómarans.
Har, sum MT verður nýtt, kunnu tillagingar av málunum loyvast, treytað av, at tær eru í trá við tær nærlýsingar, sum eru nevndar í FIFA Quality Programme for GLT (MT) og í Fótbóltslógini. Nýtsla av MT skal vera tilskilað í kappingarreglunum.
Meginreglur fyri MT
MT er bert galdandi fyri mállinjuna, og verður einans nýtt til at gera av, um eitt mál er skorað.
Fráboðanin um, at eitt mál er skorað, skal koma beinanvegin og sjálvvirkandi, og tað skal verða váttað av MT-skipanini, áðrenn eitt sekund er farið.
Fráboðanin skal einans vera til dómaratoymið (um ur dómarans, sum ristist ella gevur sjónligt tekn); hon kann eisini sendast til videorúmið (VR).
Krøv og nærlýsingar av MT
Um MT verður nýtt í kappingardystum, skulu kappingarfyriskiparanir tryggja, at skipanin (íroknað møguliga loyvdar tillagingar í málkarminum ella í tøknini í bóltinum) lýkur treytirnar í FIFA Quality Programme for GLT.
Har sum MT verður nýtt, skal dómarin royna skipanina undan dystarbyrjan fyri at tryggja, at hon riggar, sum hon skal. Víst verður til hetta í royndarhand- bókini. Riggar tøknin ikki, sum hon skal sambært royndarhandbókini, kann dómarin ikki nýta MT-skipanina, og skal hann boða viðkomandi myndugleika frá.
12. Vinnuligar lýsingar
Ikki er loyvt at hava vinnuligar lýsingar av nøkrum slag, veruligar ella tykisligar, á vøllinum, á tí øki, sum er umgyrt av mállinjuni og málnetinum, tí tekniska økinum og dómarans øki til endurskoðan. Hetta geldur eisini alt økið, sum er ein metur ella nærri uttan fyri vøllin, frá tí at liðini koma inn á vøllin við dystarbyrjan, til tey fara av vøllinum í hálvleik. Eisini geldur hetta, frá tí at liðini koma á vøllin til seinna hálvleik, og til tey fara av vøllinum aftur við dystarlok.
Ikki er loyvt at hava lýsingar á málum, netum, flaggstongum ella fløggum. Heldur ikki er loyvt at festa óviðkomandi útgerð (myndatól, mikrofonir o.s.fr.) á hesar lutir.
Lýsingar, sum standa uppreistar, skulu í minsta lagi:
13. Búmerki og eyðkennismerki
Endurframleiðsla, verulig ella tykislig, av búmerkjum ella eyðkennismerkjum hjá FIFA, sersambondum, tjóðarsambondum, kappingum, feløgum ella øðrum er bannað á vøllinum, málnetunum og teimum økjum, tey umgyrða; málunum, flaggstongum og fløggum teirra, meðan leikt verður. Búmerki og eyðkennismerki eru loyvd á fløggunum, sum eru á flaggstongunum.
14. Video hjálpardómari (VAR)
Í dystum, har VAR verður nýtt, skal eitt video rúm (VR) verða og í minsta lagi eitt øki til dómaran at endurskoða (RRA).
Videorúm (VR)
VR er har, sum video hjálpardómarin (VAR), hjálpar VAR (H-VAR) og leiðarin fyri endurspælingum (replay) (LFE) starvast. Hetta kann vera á/nær við leikvøllin ella longur burturi. Bert persónar við røttum myndugleika hava loyvi at koma inn í VR ella at samskifta við VAR, H-VAR og LFE, undir dystinum.
Ein leikari, eykaleikari, útskiftur leikari ella eitt hjálparfólk, sum kemur inn í VR, verður útvístur; eitt hjálparfólk, sum kemur inn í VR, verður burturvíst frá tekniska økinum.
Øki til dómaran at endurskoða (RRA)
Í dystum, har VAR verður nýtt, skal í minsta lagi verða eitt RRA, har dómarin fremur “endurskoðan á vøllinum” (EÁV). RRA skal vera:
Ein leikari, eykaleikari, útskiftur leikari ella eitt hjálparfólk, sum kemur inn í RRA, verður ávaraður.
Fótbóltssamband Føroya © 2024
