Steypakappingin hjá kvinnum verður spæld nakað øðrvísi í ár, í mun til undanfarin ár. Seks lið eru við í kappingini, sum eru býtt í tveir bólkar
Ársins fyrsta umfar í steypakappingini hjá kvinnum er á skránni týsagin 26. mars. Men í ár verður kappingin spæld nakað øðrvisi, enn hvat vit kenna hana annars.
Kappingarnevndin hjá Fótbóltssambandi Føroya hevur nevniliga avgjørt at skipa kappingina sum bólkaspæl, við trimum liðum í hvørjum bólki. Luttakandi liðini eru tey fimm liðini í fremstu deildini, umframt 07 Vestur, sum spælir í 2. deild.
Í bólki A eru 07 Vestur, B36 og KÍ, meðan liðini í bólki B eru EBS/Skála, HB og ÍF/Víkingur/B68.
Skráin sæst her: Steypakappingin 2019 (kvinnur)
Spælt verður tvær ferðir móti hvør øðrum í bólkaspælinum, og síðani fara nummar 1 og 2 víðari til hálvfinalurnar. Hvussu liðini møtast í hálvfinalunum, verður avgjørt við lutakasti.
Hálvfinalurnar verða spældar 3. juli og 1. ella 4. august.
Finalan í steypakappingini hjá kvinnum verður á Tórsvølli leygardagin 21. september.
