Tann 1. august byrjar Kári á Høvdanum í hálvtíðarstarvi hjá Fótbóltssambandi Føroya. Uppgávan verður millum annað at menna dómararnar í feløgunum kring landið

——————

– Hetta er eitt arbeiðsøki, sum eg veruliga brenni fyri, so eingin ivi um, at eg eri spentur og gleði meg til uppgávuna, og takki somuleiðis fyri møguleikan, sigur Kári á Høvdanum við heimasíðuna hjá FSF.

Tann 1. august byrjar Kári Jóannesarson á Høvdanum í hálvtíðarstarvi hjá Fótbóltssambandi Føroya. Uppgávan verður at hava ábyrgd av tilgongdini av nýggjum dómarum, umframt menningina av dómarum, sum eru í “Dómara 2” bólkinum.

Harafturat kemur Kári á Høvdanum at hava tætt samskifti við feløgini kring landið, og at virka sum vegleiðari og mennari hjá feløgunum og teirra dómarum.

– Vit hava nógvar dugnaligar dómarar knýttar at FSF, men eg ivist onga løtu í, at aðrir eisini eru, ið hava hug og hegni at blíva fótbóltsdómarar. Tað er teimum, sum vit skulu hava fatur á og geva so góðar umstøður sum tilber, sigur Kári á Høvdanum, ið telist millum royndu dómararnar í føroyskum fótbólti.

Kári byrjaði at døma í 2009, og seinastu fimm árini hevur hann umboðað Føroyar sum altjóða dómari.

Tann 1. august byrjar Kári Jóannesarson á Høvdanum í hálvtíðarstarvi hjá FSF. Uppgávan verður millum annað at menna nýggjar dómarar – Mynd: Sverri Egholm