Fyrireikingarnar í samband við EM-endaspælið fyri U17-landslið við gentum ganga væl. Kappingin verður í Føroyum frá 2. til 14. mai komandi ár
———
Í døgunum 2. til 14. mai komandi ár verða Føroyar vertir fyri sjálvum EM-endaspælinum fyri U17-landsliðum við gentum. Føroyar eru við sum vertsland, og skulu tí royna seg ímóti nøkrum av sterkastu londum í Evropa.
Men umframt góðan fótbólt á vøllinum, er eisini nógv uttanfyri vøllin, ið skal spæla saman, fyri at kappingin skal eydnast væl, og í Fótbóltssambandi Føroya vóna tey at endaspælið kann seta meir ferð á menningina av gentu- og kvinnufótbólti í Føroyuml.
Fyrireikingarnar fóru av álvara í gongd tíðliga í ár, og ein av teimum, ið saman við Andrasi Kjartansson Thomassen er við til at samskipa kappingina, er Maria Ziskason Nesá.
– Hetta er ein risa stór kapping, sum vónandi verður ein sonn fótbóltsveitsla, sigur Maria Ziskason Nesá millum annað í samrøðu við FSF Varpið, har hon eisini greiðir frá, hvat eitt EM-endaspæl krevur av FSF, men eisini um alt tað, ið ein sovorðin avbjóðing gevur føroyskum fótbólti.
