Tað byrjaði væl hjá føroyska U21-landsliðnum á útivølli móti Montenegro. Men áðrenn hálvleik høvdu montenegrar skorað tríggjar ferðir, og so var dysturin so gott sum avgjørdur
– Vit mugu bara ásanna, at vit møttu einum liði, sum var munandi sterkari enn vit. Gamaní byrjaðu vit væl, men í botn og grund var dysturin avgjørdur í fyrra hálvleiki, sigur venjarin, Eli Hentze við heimasíðuna hjá FSF.
Fríggjakvøldið spældi føroyska U21-landsliðið næsta dystin í undankappingini til EM 2020. Montenegro tók ímóti á City Stadion Niksic, og úrslitið gjørdist 3-0 til heimaliðið. Øll trý málini komu í fyrra hálvleiki – harav tvey eftir brotsspark.
Ein annar dystur í okkara bólki varð eisini spældur fríggjakvøldið. Spania var á vitjan í Kasakstan, og har gjørdist úrslitið 1-0 til spaniólar.
Næsti dystur hjá føroyska liðnum verður týsdagin 10. september klokkan 15:00 føroyska tíð – á útivølli móti Norðurmakedónia.
Myndir: www.FSF.fo
