Føroyska A-landsliðið vann fult uppiborið á Grikkalandi. Úrslitið gjørdist 2-1 til Føroyar. Málskjúttar vóru Hallur Hansson og Brandur Olsen
Á einum fullsettum Tórsvølli var ongantíð nakar ivi um, hvønn veg sigurin skuldi fara, tá Føroyar og Grikkaland brustu saman í EM-undankappingardysti.
Gamaní høvdu grikkar bóltin nakað meir enn okkara, men veruliga vandamikið gjørdist tað sjálvdan. Og tá gestirnir kortini komu til onkran góðan málmøguleika, stóð føroyska verjan har hon skuldi, ella var Gunnar Nielsen til reiðar at verja fyri.
Tá fyrri hálvleikur var góðan hálvan tíma gamal, kom fyrsta málið í dystinum. Sølvi Vatnhamar streyk avstað í høgru, legði bóltin fyri føturnar á Halli Hansson, sum við einum góðum fløtum skoti legði Føroyar á odda. 1-0, og stór frøi á teimum umleið 4.700 føroysku áskoðarunum.
Beinanvegin eftir steðgin løgdu grikkar eitt tungt trýst fyri at fáa útjavnandi málið, men føroyska liðið vardi væl. Hinvegin var meir vandi á ferð, tá okkara fóru í skjótálop, og tá góðir 20 minuttir vóru eftir at spæla gjørdist støðan 2-0.
Brandur Olsen legði bóltin fyri føturnar á Sølva Vatnhamar, ið av álvara er vorðin ein marra fyri grikkar, trekti móti baklinjuni. Sølvi vísti gott yvirblik, og spældi síðani bóltin út frá aftur til Brand, sum við einum góðum skotið økti um føroysku leiðsluna.
2-0 til Føroyar, og rómurin á Tórsvølli var øgiligur. Triðja málið hjá Føroyum ímóti Grikkalandi, og Sølvi Vatnhamar hevur verið upphavsmaðurin í teimum øllum.
Grikkar royndu seinastu løtuna at koma inn aftur í dystin, og tá seks minuttir vóru eftir at spæla, eydnaðist gestunnum at minka um munin. Men nærri komu grikkar ikki.
Við sigrinum er føroyska liðið nú á 4. plássi í bólki F, tvey stig meir enn Finnland og fýra stig framman fyri Grikkalandi.
Tveir aðrir dystir í bólki F vórðu eisini spældir leygardagin. Norðurírland og Rumenia spældu málleysan javnleik, meðan Ungarn vann 1-0 á útivølli ímóti Finnlandi.
7. umfar í bólkinum verður spælt fríggjadagin 4. september, og tá møtast londini soleiðis: Føroyar – Norðurírland
Grikkaland – Finnland
Ungarn – Rumenia
