Tað vera NSÍ og HB, ið bresta saman í steypafinaluni hjá kvinnum. NSÍ vann samanlagt 8-0 á B36, og í hinari hálvfinaluni vann HB samanlagt 3-1 á 07 Vestur
——————
Leygardagin 13. november verður ársins steypafinala hjá kvinnum spæld á Tórsvølli. Liðini í finaluni vera NSÍ og HB.
Leygardagin vóru seinnu hálvfinalurnar á skránni. Við tveimum málum syrgdi Rúna Jacobsen fyri einum 2-0 sigri til HB á 07 Vestur, og tryggjaði harvið teimum reyð-svørtu ein samlaðan 3-1 sigur.
Í hinari hálvfinaluna vann NSÍ samanlagt 8-0 á B36. Fyrri dysturin, sum varð spældur í Runavík, endaði 5-0 til heimaliðið, og leygardagin gjørdu runavíkskvinnur arbeiðið liðugt, og vunnu 3-0. Heidi Sevdal gjørdi øll trý málini.
Steypafinalan í fjør var millum KÍ og NSÍ, sum klaksvíkskvinnur vunnu við trimum málum móti ongum.
Í kappingini um Løgmanssteypið verða fyrru hálvfinalurnar spældar 20. og 21. november, og seinnu hálvfinalurnar verða 27. og 28. november.
NSÍ og HB hittast í aðrari, meðan B36 og Víkingur møtast í hinari. Finalan verður á Tórsvølli leygardagin 4. desember.
