Tað endaði 1-1 millum Føroyar og Kasakstan á Tórsvølli leygardagin. Føroyski málskjúttin var Áki Samuelsen, sum legði Føroyar á odda tá fjúrtan minuttir vóru spældir
——————
Søgan hevur tað við at endurtaka seg, og soleiðis var eisini leygardagin, tá Føroyar og Kasakstan møttust á Tórsvølli. Tí júst sum fyri trettan árum síðani, so gjørdist úrslitið aftur hesaferð javnleikur 1-1.
Føroyar komu á odda tá eitt lítið korter var spælt. Eftir sera gott spæl í vinstru síðu endaði bólturin fyri føturnar á Áka Samuelsen, og við einum góðum og hørðum skoti smekkaði hann bóltin upp í málhornið.
Kasakstan svaraði aftur miðskeiðis í fyrra hálvleiki og fekk javnað til 1-1 við máli sum Temirlan Erlanov skoraði.
Sum heild hevði føroyska liðið yvirvág í spæli og kjansum, men í avgerandi løtum var neyðuga hepni ikki við okkara monnum.
Tá tíggju minuttir vóru eftir at spæla setti Eyðun Klakstein Mattias Hellisdal á vøllin, ið harvið fekk sínar fyrstu minuttir á A-landsliðnum.
Aftaná dystin føroyski varð málskjúttin, Áki Samuelsen kosin til dagsins spælara á sona appini.
Í hinum dystinum í bólkinum vann Slovakia 2-0 á heimavølli ímóti Moldova.
Týsdagin er annað umfar í bólkinum á skránni. Tá møtast Moldova og Føroyar, og Slovakia og Kasakstan.
Myndir: Jóhanna Thomsen og Hans Erik Danielsen
