Nú ber til at keypa atgongumerki til steypafinaluna hjá kvinnum millum Víking og NSÍ, sum verður á Tórsvølli leygarkvøldið 5. oktober klokkan 18:30
Tað vera Víkingur og NSÍ, ið bresta saman, tá steypafinalan hjá kvinnum verður spæld á Tórsvølli um eina viku, leygarkvøldið 5. oktober klokkan 18:30.
Talan verður uttan iva um eitt brak millum tvey góð og væl spælandi lið, ið liggja tætt á stigatalvuni í landskappingini, og sum í hálvfinalunum vunnu sínar dystir rættuliga sannførandi.
Um hugt verður at innanhýsis dystunum millum Víking og NSÍ í ár, hava runavíkskvinnur havt eina lítla yvirvág. Tær hava møtt hvør øðrum tríggjar ferðir, og tvær ferðir er endað við javnleiki 1-1, meðan tann eini dysturin endaði við trivaligum 5-2 sigri til NSÍ.
Atgongumerki til ársins steypafinaluna millum Víking og NSÍ fáast til keyps í nethandilinum á FSF.fo, og á atgongumerki.fo. Kostnaðurin er 100 krónur fyri vaksin, meðan børn, sum eru fylt 14 ár og yngri, sleppa inn fyri einki. Tó er krav, at øll børn hava atgongumerki, sum fæst ókeypis í nethandilinum.
Tilsamans níggju steypafinalur eru annars á skránni í ár. Tann fyrsta verður mikukvøldið 2. oktober klokkan 19:00, tá U16 genturnar hjá KÍ og Skála fara at dystast um Eilif Arge steypið, og fótbóltsárið endar við finaluni um Løgmanssteypið, sum verður leygardagin 2. november klokkan 17:00, tá høvuðsstaðarfeløginni, B36 og HB bresta saman.
Mikudagin 2. oktober
U16 gentur: KÍ – Skála (kl. 19:00)
Dómari: Annika Breiðaskarð
Hósdagin 3. oktober
U21: B71 – ÍF (kl. 19:30)
Dómari: Leivur Zachariassen
Fríggjadagin 4. oktober
U13 gentur: B36 – 07 Vestur/MB (kl. 17:30)
Dómari: Ørvur Mortensen
Minna steypakap. kv.: FC Hoyvík – Skála (kl. 19:30)
Dómari: Dávid W. Sjóstein
Leygardagin 5. oktober
U13 dreingir: B36 – Víkingur (kl. 10:30)
Dómari: Dominick Troleis
U15 dreingir: Víkingur – B36 (kl. 12:30)
Dómari: Jákup V. Larsen
U17 dreingir: KÍ – Víkingur (kl. 15:15)
Dómari: Heri Wang Danielsen
Kvinnur: Víkingur – NSÍ (kl. 18:30)
Dómari: Andrass Frederiksberg
Leygardagin 2. november
Løgmanssteypið: B36 – HB (kl. 17:00)
