Eyðun Klakstein hevur úttikið Áka Johannesen úr B68 í staðin fyri Samuel Chukwudi, ið orsaka av skaða hevur givið avboð til dystin móti Andorra
——————
Seinnapartin mánadagin fór U21-landsliðið, við Eyðuni Klakstein og Atla Gregersen á odda, undir fyrireikingarnar til fyrsta EM-undankappingardystin í hesum umfarinum.
Fríggjadagin tekur føroyska liðið ímóti Andorra við Djúpumýru í Klaksvík, men tað verður uttan risan í verjuni, Samuel Johansen Chukwudi úr HB. Samuel stríðist við ein vøddaskaða, og verður tískil ikki tøkur til komandi uppgávu.
Í staðin hevur Eyðun Klakstein, venjari, sent boð eftir Áka Johannesen úr B68.
U21 EM-undankappingardysturin millum Føroyar og Andorra verður við Djúpumýru í Klaksvík fríggjadagin 16. juni klokkan 18:00. Atgongumerki fáast til keyps í Nethandilinum á FSF.fo.
Hini londini í bólkinum eru Portugal, Kroatia, Grikkaland og Hvítarussland.
Myndir: Hans Erik Danielsen
