Greipuvinnararnir KÍ og avbjóðararnir NSÍ bresta saman í dystinum um Stórsteypið hjá Lions leygardagin

Lagt er upp til eitt sera spennandi kappingarár í bestu kvinnudeildini. Átta lið eru við í kappingini í ár, og í VFF Cup hevur NSÍ givið greið boð um sína styrki, ikki minst, tá tær vunnu 3-1 móti KÍ í finaluni. Men greipuvinnararnir úr Klaksvík hava longu møguleika fyri at reisa seg aftur nú leygardagin. Tá bresta liðini aftur saman á Tórsvølli til síðstu styrkisroyndina áðrenn kappingarbyrjan: Stórsteypadystin. 

Lions Club Tórshavn skipar sum vant fyri Stórsteypadystinum, og peningurin fer í ár til átakið “Øll hava rætt til góð barnaár”, sum Blái krossur varðar av. 

Stórsteypadysturin hjá kvinnum verður spældur á Tórsvølli, leygardagin 13. mars kl. 17.00. Atgongumerki verða seld við dyrnar fyri 100 krónur, og vit heita á viðhaldsfólk og áskoðarar um at fylgja koronareglunum, sum kunnu lesast her. Harumframt verður dysturin vístur beinleiðis á Rás1.

Sum nevnt eru átta lið í Betri Deildini hjá kvinnum í ár, nevniliga KÍ, NSÍ, HB, B36, Víkingur, EBS/Skála, AB/B71 og 07 Vestur. Kappingin byrjar leygardagin 20. mars.