Við 10 av 10 møguligum atkvøðum gjørdist Sølvi Vatnhamar úr Víkingi greiði vinnarin, tá besti spælarin í mai mánað skuldi veljast. Nummar 2, 3 og 4 vóru eisini úr Víkingi

——————

– Tað var fantastiskt, og takk fyri tað! Hetta eri eg sjálvandi errin og glaður fyri. Eg haldi annars at tað hevur gingið væl í Víkingi í seinastuni, og so er bara at hopa, at hendan góða gongdin heldur fram.

Soleiðis sigur Sølvi Vatnhamar, tá honum verður ynskt tillukku, og hann samstundis verður kunnaður um, at hann er kosin til besta spælara í Betri Deildini hjá monnum í mai mánað 2022.

At tað hevur hilnast væl hjá Sølva higartil í landskappingini sæst eisini aftur á listanum yvir toppskjúttar, har fryntligi og dámligi leirvíkingurin er ovast við 13 málum eftir fyrstu 13 umførini.

Tað eru landsliðsvenjarar, fjølmiðlar og onnur, ið velja besta spælara hvønn mánað. Og av teimum tíggju, ið atkvøða, høvdu allir Sølva Vatnhamar millum tey trý nøvnini, ið verða sett á atkvøðuseðilin.

Fyri heiðurin fekk Sølvi Vatnhamar handað eitt gávubræv upp á 1.500 krónur frá EFFO, umframt eina glasstandmynd, ið er latin av Betri.

Nummar 2 bleiv Andreas Lava Olsen úr Víkingi, og á einum deildum triðja plássi komu tveir aðrir liðfelagar hjá Sølva og Andreasi Lava, nevniliga Bárður Jógvansson Hansen og Geza David Turi.

Myndir: Bjarni Enghamar