Fríggjadagin og leygardagin, 7. og 8. februar, skipar FSF fyri skeiði/seminar um barna- og ungdómsfótbólt við luttøku úr Noregi
Í døgunum 7. og 8. februar fær Fótbóltssamband Føroya forkunnuga vitjan úr Noregi, tá Øyvind Larsen, Jarl Torske, Gøril Kringen og Gunnvor Halmøy, ið øll á ymiskan hátt dagliga arbeiða við norskum fótbólti á grassroots- og eitustøði, koma at hava skeið/seminar um barna- og ungdómsfótbólt.

Allir føroyingar, ið eru góðir við fótbóltin og síggja virðið í tí, at børn, ung og vaksin luttaka í hesum spæli, fegnast um, at so nógv smábørn byrja at spæla fótbólt. Kortini halda tey flestu fótbóltsáhugaði, at tey kundu verið fleiri – ikki minst gentur, og at tað samstundis er at harmast um, at nógv gevast tá ungdómsárini koma.

Á skeiðinum/seminarinum 7. og 8. februar, ið er ætlað ungdómsvenjarum, nevndarlimum, foreldrum og øðrum áhugaðum, verður varpað ljós á hesa avbjóðing.

Endamál/innihaldið á skeiðnum/seminarinum, er at vísa á avbjóðingar og møguleikar í venjingini av børnum og ungum, og at seta sær spurningarnar:
– Hvat gera vit fyri at fáa tey smáu (um 6 ára aldur) at byrja at spæla fótbólt?
– Hvussu fáa vit børnini og tey ungu (6-18 ár) at trívast, mennast og halda á við fótbóltinum?
– Hvat og hvussu gera vit, so hvør einstakur kann spæla samsvarandi áhuga og førleikum?
– Hvørja uppgávu og hvønn leiklut hava ymsu partarnir – foreldur, felagið, venjarar og FSF?

Skeiðið/seminarið verður hildið í FSF-húsinum í Havn fríggjadagin 7. februar, kl. 17 til 20, og heldur fram leygardagin 8. februar, kl. 9 til 17.

Skeiðið/seminarið er ókeypis, men neyðugt er við skrivaligari tilmelding, við at útfylla Tilmeldingarskjalið, og síðani senda tað til doris@fsf.fo, í seinasta lagi mánadagin 3. februar 2014.

Tilmeldingarskjal (Word)

Tilmeldingarskjal (pdf)

 
Øyvind Larsen:

Starvast í Norska Fótbólts­samband­i­num (NFF) innan venjara­útbúgving og fótbólts­menning. Er royndur fyrlestrarahaldari og hevur verið við til at skrivað bókina "Flest møguligt – flest møgugulig – best møguligt".

 
Jarl Torske:

Er U19-landsliðsvenjari hjá norska gentulandsliðnum. Hevur verið ungdómslandsliðsvenjari í mong ár og luttikið í fleiri EM- og HM-endaspølum. Hevur Pro-lisens sum venjari.

 
Gøril Kringen:

Menningar­leiðari á kvinnusíðuni í norska fótbóltssambandinum (NFF). Er sum leikari olympiskur meistari í fótbólti, og hevur luttikið í HM-og EM-endaspølum. Er millum mest vinnandi leikarar í Noregi.

 
Gunnvor Halmøy:
Er útbúgvin fysioterapeutur og fak­konsulentur á Olympia­toppen. Arbeitt mong ár við norskum ungdómslandsliðum og í Tippeliguni, ið er besta fótbóltsdeildin í Noregi.