FSF hevur gjørt klædnaavtalu við Erreà, sum í fyrsta umfar er galdandi næstu fýra árini. Nýggja landsliðstroyggjan verður tikin í brúk í summar

——————

Eftir at hava spælt í Macron seinastu fýra árini, fara føroysku fótbóltslandsliðini í annað klædnamerki í summar. Nýggj avtala er gjørd við Erreà.

Erreà, ið eins og Macron er italskt, er millum annað væl kent í Íslandi. KSI, íslendska fótbóltssambandið hevði frá 2004 til 2018 avtalu við Erreà, og tá Ísland var til EM í 2016 og til HM í 2018, spældu teir í klæðum frá Erreà.

Nýggja klædnaavtalan millum Fótbóltssamband Føroya og Erreà hevur við sær, at Landsliðsbúðin, ið hevur hildið til í somu hølum sum No12, letur fyribils aftur. Tó verður framvegis møguleiki at keypa føroyska landsliðsbúnan í Nethandilinum á FSF.fo.

Eftir ætlan fara Ásla Johannesen, Hallur Hansson og hinir landsliðsspælararnir í Erreà í juni mánað, tá millum annað fyrstu dystirnir í UEFA Nations League eru á skránni. Og tá er eisini ætlanin, at Landsliðsbúðin letur upp aftur.