Meðan U15-genturnar fara til Baltic Cup í Litava, og U17-dreingirnir skulu taka lut í NM í Finnlandi, ferðast U16-genturnar til Írlands, har tveir venjingardystir eru á skránni
——————
Fitt av landsliðsvirksemi er á breddanum hjá føroysku ungdómslandsliðunum í august mánað.
Mótstøðulondini vera Danmark, Noreg, Estland, Lettland og Litava, og tvær ferðir Írland. Afturat hesum kemur eitt annað av norðurlondunum, tá plaseringsdystirnir í NM fyri U17 Dreingir skulu spælast.
Ungdómslandsliðini skulu nevniliga spæla í alt átta landsdystir í komandi mánað.
Í Baltic Cup 2023, sum í ár verður í Litava, skulu U15-genturnar spæla ímóti Estlandi og Lettlandi, umframt litavisku vertunum.
U16-genturnar sleppa eisini at royna seg í næstum. Fótbóltssamband Føroya hevur fingið avtalu í lag við írska fótbóltssambandið, at Írland verður vertur fyri tveimum venjingardystum í august. Fyrri dysturin verður 22. august, meðan tann seinni verður hósdagin 24. august.
Men fyrstu landsliðsavbjóðingarnar í komandi mánað vera frá 1. til 9. august, tá árliga NM kappingin fyri U17 Dreingir er á skránni.
Føroyar leggja fyri ímóti Danmark fríggjadagin 4. august, og tveir dagar seinni er Noreg mótstøðuliðið. Triðji dysturin verður týsdagin 8. august, tá plaseringsdystirnir skulu spælast.
Sum skráin sær út í løtuni, so spæla føroysku fótbóltslandsliðini tilsamans 57 dystir í 2023
Skráin
4. aug. Føroyar – Danmark (U17 Dreingir)
6. aug. Føroyar – Noreg (U17 Dreingir)
8. aug. Plaseringsdystir (U17 Dreingir)
23. aug. Litava – Føroyar (U15 Gentur)
25. aug. Estland – Føroyar (U15 Gentur)
27. aug. Føroyar – Lettland (U15 Gentur)
22. aug. Írland – Føroyar (U16 Gentur)
24. aug. Írland – Føroyar (U16 Gentur)
