Við 2-0 sigri á KÍ er Víkingur steypavinnari 2026 hjá monnum. Ingi Jonhardsson og Aron Jarnskor Ellingsgaard gjørdu málini fyri teir ljósabláu
——————
Omanfyri 3.000 áskoðarar vóru leygarkvøldið vitni til eina spennandi finalu um Løgmanssteypið hjá monnum ímillum Víking og HB.
Og tá avtornaði fóru teir ljósabláu avstað við steypinum, eftir at Víkingur hevði vunnið 2-0.
Í steðginum var málleyst, men tá seinni hálvleikur var hálvrunnin legði Ingi Jonhardsson Víking á odda, og sjey minuttir fyri leiklok økti Aron Jarnskor Ellingsgaard um Víkingleiðsluna.
Aftaná dystin varð málverjin hjá Víkingi, Bárður á Reynatrøð, ið spældi ein framúr góðan dyst, valdur til dagsins spælara.
Ungdómsfinalur
Tríggjar ungdómsfinalur vórðu eisini spældar um vikuskiftið.
Hóskvøldið møttust U15-dreingirnir hjá HB og Víkingi. HB var greitt omaná og vann 5-1. Málini gjørdu Palli Bernhardsson Petersen og Allan Ramiro Joensen, sum skoraðu tvey part, meðan William Christiansen stóð fyri einum. Einsamalla málið hjá Víkingi skoraði Eyðnar Isaksen.
Fríggjakvøldið brustu HB og KÍ saman í steypafinaluni fyri U16 gentur. HB var á odda bæði 1-0 og 2-1, men klaksvíksgenturnar góvu ongantíð skarvin yvir, og tá avtornaði vann KÍ 3-2. Sigursmálið skoraði Gunhild Arge Joensen beint fyri leiklok.
Lilja Eiriksdóttir Højsted og Julia Rósa Dal Christiansen stóðu fyri málunum hjá HB, meðan Gunhild Arge Joensen, sum skoraði tvær ferðir, og Erla Joensen gjørdu málini hjá KÍ.
Aftaná dystin varð Petsy Káradóttir Nielsen hjá HB kosin til besta spælara í finaluni.
Tíðliga seinnapartin leygardagin var finalan fyri U18 dreingir. Aftur hesaferð vóru liðini HB og Víkingur, og aftur gjørdist talan um ein greiðan HB sigur. Úrslitið varð 7-0 til teir reyð-svørtu, sum vóru odda 4-0 í hálvleikinum.
Dánial Mørkøre og Edvard Falkenberg skoraðu trý mál hvør, meðan Jónas Sigtórsson gjørdi eitt. Aftaná dystin varð Edvard Falkenberg kosin til dagsins spælara.
Myndir frá finaluni um Løgmanssteypið hjá monnum – Myndir: Jóhanna Thomsen
