Tórsvøllur

Tórsvøllur

Við staðseting í Gundadali nærhendis miðbýin í Havn, er tjóðarleikvøllurin lættur hjá vitjandi at finna. Hetta er størsti leikvøllur í landinum og heimavøllur fyri føroysku A-landsliðini.

Áskoðarapláss: 1300 setur (Til WU17 Euro 2025).

Vøllur: Graslíki.

Søga: Tórsvøllur varð tikin í nýtslu 9. juli 1999 og avloysti tá Svangaskarð á Toftum sum tjóðarleikvøllur. Fyrsta undirlagið á vøllinum var veruligt gras, men eftir nøkur ár varð vøllurin skiftur til graslíkisvøll. Undirlagið er framvegis graslíki, men nú eisini við undirliggjandi hitaskipan, sum tryggjar, at spælandi er á Tórsvølli alt árið.

Við tíðini eru stórar broytingar og umvælingar framdar kring Tórsvøll, eitt nú við nýggjum ljósum, sitiplássum og nýbygdum hølum á vestursíðuni.

Sí reglur fyri leikvøll

Á Djúpumýru

Á Djúpumýru

Vøllurin á Djúpumýru liggur í hjartanum í Klaksvík, næststørsta býnum í Føroyum. Hetta er heimavøllurin hjá Klaksvíkar ítróttarfelag, sum er eitt av mest vinnandi fótbóltsfeløgum í landinum.

Áskoðarapláss: 800 setur (Til WU17 Euro 2025).

Vøllur: Graslíki.

Søga: Vøllurin á Djúpumýru hevur verið eitt týdningarmikið ítróttarstað í Klaksvík í meira enn eina øld. Fyrsti dysturin varð leiktur 18. august 1912, har KÍ tók ímóti HB – ein “klassikari” í nútíðarhøpi.

Í 2019 varð vøllurin og húsið dagført munandi við nýggjum tilbygningi, sum eitt nú húsar skiftingarrúmum, venjingarumstøðum og øðrum viðkomandi hølum. Við hesum kom vøllurin á Djúpumýru eisini til at lúka altjóða krøv, soleiðis at hann nú kann hýsa europeiskum dystum og øðrum stórum tiltøkum.

Sí reglur fyri leikvøll

Søgulig fótbóltshátíð í Føroyum

Frá 4. til 17. mai 2025 eru Føroyar vertir fyri UEFA U17 EM-endaspælinum hjá kvinnum – ein søgulig fótbóltskapping fyri okkara land. Hetta er fyrstu ferð, at ein so stór altjóða fótbóltskapping verður hildin í Føroyum, og vit fáa møguleikan at uppliva nakrar av teimum bestu ungu fótbóltsleikarunum í Evropa. Sum vertstjóð luttekur føroyska U17-landsliðið eisini, og hetta gevur eisini føroyskum fjepparum góðar møguleikar fyri at stuðla okkara gentum!

Kappingarleisturin

EM-endaspælið verður skipað við átta liðum, sum kappast um meistaraheitið. Kappingin er skipað í tveimum bólkum við fýra liðum í hvørjum. Hvørt lið spælir tríggjar dystir í bólkaspælinum, og samanlagt verða 12 dystir avgreiddir áðrenn hálvfinalurnar.

Samanlagt verða átta dystir spældir á Tórsvølli og sjey á Djúpumýru. Fyrst teir seks bólkadystirnir í hvørjum stað, og síðan eisini ein hálvfinala í hvørjum stað. Harumframt verður eisini ein play-off dystur á Tórsvølli, har liðini á triðja plássi í hvørjum bólki spæla um eitt pláss til HM endaspælið seinni í ár.

Kappingin endar við einari stórari finalu á Tórsvølli 17. mai, har nýggi evropameistarin verður funnin.

Søgan heldur fram

Endaspælið er meira enn ein EM-kapping. Hetta er eisini vegurin til FIFA U17 HM 2025 endaspælið, sum verður spælt í Marokko 17. oktober til 8. november.

Lat okkum gera hetta til eina fótbóltsveitslu, sum vit seint fara at gloyma! Kom og stuðla okkara U17 kvinnuliði og uppliv søguligar fótbóltsdagar í Føroyum!

Ver við!

Henda kappingin snýr seg ikki bert um fótbólt, men er eisini ein serlig løta fyri okkum øll at savnast og njóta tað, sum ger Føroyar heilt serligar. Tað verður eitt upplivilsi fyri okkum sum fótbóltstjóð, har vit kunnu vísa føroyska eldhugan fyri fótbólti frá síni bestu síðu!

Kapping við átta liðum (vertstjóð)

2023/24: Spania (Svøríki)
2022/23: Frankaríki (Estland)
2021/22: Týskland (Bosnia og Hersegovina)
2019/20 & 2020/21: Einki endaspæl
2018/19: Týskland (Bulgaria)
2017/18: Spania (Litava)
2016/17: Týskland (Kekkia)
2015/16: Týskland (Hvítarussland)
2014/15: Spania (Ísland)
2013/14: Týskland (Ongland)

Kapping við fýra liðum í Nyon

2012/13: Pólland
2011/12: Týskland
2010/11: Spania
2009/10: Spania
2008/09: Týskland
2007/08: Týskland

Legacy-verkætlanin fyri UEFA WU17 2025 í Føroyum

Legacy er ein fastur partur av øllum UEFA-endaspølum fyri gentur og kvinnur, sum skal tryggja, at kappingin ikki bert er eitt hæddarpunkt í løtuni, men eisini skapar varandi menning. Ofta verður sjóneykan sett á at økja um luttøkuna, men eisini á evni, sum hava serligan týdning fyri gentusíðuna.

Føroyar hava lutfalsliga heimsins hægsta luttøkutal í fótbólti. Hóast 9,4% av føroyskum kvinnum eru skrásettir spælarar, er tað avbjóðandi at menna tær bestu og geva teimum møguleikan at røkka altjóða hæddum. Tí hevur Legacy-verkætlanin í UEFA WU17 2025 eitt greitt fokus: at styrkja føroysku úrvalsleiðina hjá gentum í aldrinum 13-16 ár. Verkætlanin miðar eftir at bróta forðingar og skapa bestu fortreytirnar fyri, at fleiri gentur kunnu fáa eina yrkisleið í fótbólti – eins og nógvir spælarar hjá monnum hava havt í áravís.

Mál og átøk í Legacy-verkætlanini

Verkætlanin fevnir sum heild um seks átøk, sum taka útgangsstøði í fótbólti, íblástri og mentan. Tá tað kemur til fótbóltsførleika, verður dentur lagdur á menningarætlanir fyri gentur og vegleiðing til venjarar, sum kunnu stuðla teirra menning. Íblásturin kemur millum annað ígjøgnum tiltøk í samband við WU17-endaspælið, sum skulu eggja spælarum, og kunningartilfar, ið gevur teimum innlit í, hvat krevst fyri at røkka hægsta stigi í fótbólti. Mentanarliga menningin fevnir um kunning til foreldur um, hvussu tey kunnu skapa eitt stuðlandi heimligt umhvørvi fyri spælararnar, og til skúlar og arbeiðsgevarar, sum kunnu hjálpa til við at finna eina javnvág millum fótbólt, skúla og arbeiði. Við hesum átøkum vil Legacy-verkætlanin tryggja, at teir evnaríku spælararnir í Føroyum fáa bestu møguleikar fyri at mennast – bæði á vøllinum og uttanfyri.

Ein dreymur, sum kann blíva veruleiki

Mong hava prógvað, at tað ber til at gerast yrkisleikari, men fortreytirnar eru ymiskar fyri menn og kvinnur. Higartil hava vit sæð fleiri mannligar spælarar taka stigið inn í yrkisfótbólt, meðan tað á kvinnusíðuni enn er serstakt. Har mannligir spælarar hava havt greiðar møguleikar at taka næsta stigið, krevst ofta at kvinnuligir spælarar sjálvar fara út at leita eftir møguleikum.

Við Legacy-verkætlanini vilja vit gera tað lættari hjá føroyskum gentum at fylgja sínum dreymi um at røkka hægsta støði í fótbólti – við einum betri og skipaðum grundarlagi her heima. Tað byrjar við einum dreymi.