Nýggjastu tíðindini

Melda til tíðindabræv

Tíðindi - 21. juni 2012

Undirtøkan til venjaraskeiðini hjá FSF hevur verið sera góð seinasta hálva árið, og serliga kvinnurnar hava veruliga tikið av møguleikanum, nú tær kunnu luttaka ókeypis.

Nú árið er hálvrunnið vísa hagtølini frá venjaraskeiðunum, at virksemið hevur verið rættiliga stórt. Men tølini vísa eisini, at kvinnurnar nú eisini eru ein rættuliga stórur partur av teimum ið luttaka.

Íalt 11 venjaraskeið hava verið higartil í ár, við tilsamans 279 luttakarum. Av hesum telja kvinnurnar 63 luttakarar, ella 22,6%. Samlaða tímatalið fyri tey 11 skeiðini, er 256 tímar ella 5.402 luttakaratímar.

Venjaraskeiðini, ið Fótbóltssamband Føroya hevur skipað fyri, kunnu býtast í tveir bólkar – útbúgving og impulsskeið. Útbúgvingin fevnir um tey skeiðini, sum til endans geva B-prógv ella A-prógv, meðan impulsskeiðini fyrst og fremst eru ætlaða at geva teimum íblástur, sum frammaundan hava tikið B- ella A-prógv.

Umleið 44% av øllum teimum sum luttóku, vóru á útbúgvingarskeiðunum, meðan 56 % vóru á impulsskeiðunum.

Í yvirlitinum niðanfyri sæst, at kvinnurnar hava verið serliga raskar at luttikið á útbúgvingar¬skeið-unum. Har telja tær umleið 40%.

Fýra B1-skeið vóru um mánaðarskifti januar-februar. Av teimum vóru tvey í Havn, eitt í Leirvík og eitt venjaraskeið var í Klaksvík. Øll hini skeiðini vóru í Havn.

Hyggja vit eftir hvaðani luttakararnir koma frá, so sæst, at uml 4% koma úr Norðoyggjum, 38% úr Eysturoynni, 37% úr Havn, 3% úr Sandoynni, 6% úr Vágum og 11% úr Suðuroynni.

Tað, at kvinnur sleppa ókeypis á venjaraskeiðini hjá FSF í 2012, er helst ein orsøk til góðu undirtøkuna frá teirra síðu.

Í dag eru tilsamans umleið 100 venjarar við A- og/ella B-prógvi. Hesi skulu endurnýggja lisensin eftir trimum árum. Hetta gera tey millum annað við at luttaka á góðkendum impulsskeiði í minst 15 tímar í hesum tíðarskeiði. Hetta er helst eisini ein orsøk til góðu undirtøkuna, ið tey fýra impulsskeiðini hava fingið.

Í september verður B-próvtøka og í november verður B3-venjaraskeið. Møguliga verður B2-venjaraskeið í oktober.

Skeiðsskráin fyri 2013 er ikki løgd, men ætlanin er at fara undir eitt nýtt A-venjaraskeið í januar-februar 2013.

Høvuðsstuðlar

Aðrir Stuðlar